ເບິ່ງພາບມູມສູງ: https://www.facebook.com/share/v/1ApGnkjSU4/
ວັນທີ 16 ມິຖຸນາ 2025, ທ່ານ ອາລຸນໄຊ ສູນນະລາດ ກາມະການສູງກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຈໍາປາສັກ ພ້ອມດ້ວຍ ທ່ານ ສຸພາບ ທໍາມະຮັກສາ ເລຂາຄະນະບໍລິຫານງານພັກນະຄອນ, ທ່ານ ສຸກວິໃສ ສີສົມຫວັງ ເຈົ້ານະຄອນປາກເຊ ແລະ ການນໍາຂອງນະຄອນ ໄດ້ເຄື່ອນໄຫວຕິດຕາມຊຸກຍູ້ການສ້ອມແປງ - ກໍ່ສ້າງທາງເບຕົົງ 2 ເສັ້ນ ຢູ່ບ້ານພັດທະນາໂພນໄຊ ນະຄອນປາກເຊ ໂດຍມີການນໍາບໍລິສັດຜູ້ຮັບເໝົາການກໍ່ສ້າງ, ຄະນະພັກ - ອົງການປົກຄອງບ້ານພັດທະນາໂພນໄຊ ເຂົ້າຮ່ວມ. ທັງນີ້,ກໍເພື່ອເປັນການຊຸກຍູ້ໃຫ້ການກໍ່ສ້າງເສັ້ນທາງເບຕົງດັ່ງກ່າວ ມີຜົນສໍາເລັດ, ຕອບສະໜອງໃຫ້ແກ່ການສັນຈອນໄປ – ມາ ມີຄວາມສະດວກ ທັງປະກອບສ່ວນໃຫ້ນະຄອນປາກເຊ ມີຄວາມເປັນລະບຽບຮຽບຮ້ອຍສະອາດຈົບງາມ.
ໂອກາດນີ້, ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ກໍມີເຫັນ ໂດຍຍ້ອງຍໍຊົມຊົມຄະນະພັກ - ອົງການປົກຄອງນະຄອນປາກເຊ,ຄະນະພັກ - ອົງການປົກຄອງບ້ານ ແລະ ພໍ່ແມ່ປະຊາຊົນພາຍໃນບ້ານພັດທະນາໂພນໄຊ ທີ່ມີຄວາມຕັດສິນໃຈເປັນເອກະພາບ ພ້ອມພຽງກັນປະກອບສ່ວນດ້ານວັດຖຸ ແລະ ທຶນຮອນໃນການກໍ່ເສັ້ນທາງພາຍໃນບ້ານ. ພ້ອມນີ້ ກໍສະແດງຄວາມຂອບໃຈນັກທຸລະກິດ, ຜູ້ປະກອບການ ທີ່ສະໜັບສະໜູນທຶນຮອນປະກອບສ່ວນໃນການກໍ່ສ້າງທາງເບຕົງ ຢູ່ບ້ານດັ່ງກ່າວ. ຕອນທ້າຍ ທ່ານ ຍັງມີຄໍາເຫັນແນະນໍາໃຫ້ຫ້ອງການ ຍທຂ ນະຄອນປາກເຊ ສົມທົບກັບ ຄະນະພັກ - ອົງການປົກຄອງບ້ານ ແລະ ພໍ່ແມ່ປະຊາຊົນ ປະກອບສ່ວນໃນການອະນາໄມ ແລະ ຮັກສາເສັ້ນທາງ ເພື່ອເຮັດໃຫ້ເສັ້ນທາງສາມາດນໍາໃຊ້ຢ່າງຍືນຍົງ.
ທ່ານ ສຸກວິໃສ ສີສົມຫວັງ ເຈົ້ານະຄອນປາກເຊ ໃຫ້ຂໍ້ມູນວ່າ: ການສ້ອມແປງ - ກໍ່ສ້າງເສັ້ນທາງ ຢູ່ຂອບເຂດບ້ານໂພນໄຊ ຄັ້ງນີ້ ມີ 2 ເສັ້ນທາງ ຄື: ເສັ້ນທາງເລກທີ 24 ແລະ 46,ຮູບແບບການສ້ອມແປງ – ກໍ່ສ້າງ ແມ່ນຕາມແບບມາດຖານຂອງກະຊວງໂຍທາທິການ ແລະ ຂົນສົ່ງ ກໍານົດໄວ້ ຄື: ເສັ້ນທາງເລກທີ 24, ກວ້າງ 12 ແມັດ + ທາງຄົນຍ່າງ ກວ້າງ 1,5 ແມັດ x 2 ເບື້ອງ ເປັນ 3 ແມັດ, ລວມ 15 ແມັດ, ຍາວ 320 ແມັດ, ໜາ 23 ຊັງຕີແມັດ, ຮ່ອງລະບາຍນໍ້າເປັນຮູບໂຕຢູ. ເສັ້ນທາງເລກທີ 46, ກວ້າງ 9 ແມັດ, ທາງຄົນຍ່າງ ກວ້າງ 1,5 ແມັດ x 2 ເບື້ອງ ເປັນ 3 ແມັດ, ລວມ 12 ແມັດ, ຍາວ 393 ແມັດ x ໜາ 23 ຊັງຕີແມັດ, ຮ່ອງລະບາຍນໍ້າເປັນຮູບໂຕຢູ ໂດຍແມ່ນບໍລິສັດ ຕັງຈະເລີນ ເປັນຜູ້ດໍາເນີນການສ້ອມແປງ – ກໍ່ສ້າງ ມູນຄ່າປະມານ 10 ຕື້ກີບ ເຊິ່ງເປັນການຮ່ວມທຶນລະຫວ່າງ ລັດ, ນັກທຸລະກິດ ແລະ ປະຊາຊົນ ໂດຍສະເພາະແມ່ນການປະກອບສ່ວນຂອງ ບໍລິສັດ ຈະເລີນເຊກອງ ກໍ່ສ້າງ, ນະຄອນປາກເຊ ຄະນະພັກ – ອົງການປົກຄອງບ້ານ ແລະປະຊາຊົນພາຍໃນບ້ານພັດທະນາໂພນໄຊ. ປັດຈຸບັນ ບໍລິສັດ ຕັງຈະເລີນ ໄດ້ລົງມືສ້ອມແປງ – ກໍ່ສ້າງເສັ້ນທາງທັງເທເບຕົງ ແລະ ອະນາໄມໜ້າທາງ, ເກດ – ກວາດປັບລະດັບໜ້າທາງ, ຈົກຮ່ອງ – ວາງທໍ່ລະບາຍນໍ້າ ເພື່ອສູ້ຊົນສ້ອມແປງ - ກໍ່ສ້າງໃຫ້ສໍາເລັດໃນເດືອນກັນຍາ 2025 ແລະ ທັນກັບກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ. ສ່ວນລະບົບໄຟເຍືອງທາງ ຈະມີການຕິດຕັ້ງອີກຕ່າງຫາກ ເຊິ່ງບໍ່ລວມໃນມູນຄ່າການສ້ອມແປງ – ກໍ່ສ້າງເສັ້ນທາງ.
- ຂ່າວ-ພາບ: ທູນທອງໃຈ